Einfaldur lax með spínati, furuhnetum og mango chutney

 

 

Þessi uppskrift er passleg fyrir 2. Við Linda systur snæddum þetta á sl. laugardagskvöld með hvítvíni, það rann afar ljúft niður með þessari dýrindis máltíð.

1 flak ferskur lax, 350-400 g
salt og svartur pipar eftir smekk
1/4 - 1/2 dl soya sósa
1/2 - 1 dl matarolía (mjög gott að nota olíu með sítrónu í)
1/2 lime eða sítróna (eða bara sítrónusafi úr svona flösku, þá u.þ.b. 1/4 dl giska ég á)
4-6 handfylli spínat
1-2 dl furuhnetur
1-2 dl Mild Mango Chutney

Olíu og soya sósu hrært saman og hellt yfir laxinn. Lime/sítrónusafi kreist yfir laxinn og salt og pipar stráð yfir. Flak skorið þversum í 2-3 cm breið stykki. Steikt á pönnu eða grillað þar til fiskurinn er eldaður í gegn. Ég notaði grillpönnu sem er snilldaruppfinning, maturinn verður svo girnilegur með grillrákunum í.

Spínat og furuhnetur sett á disk, steiktu flökin svo sett þar ofan á og að lokum mango chutney. Afskaplega einfalt og lítið uppvask.

Gæti verið gott að hafa snittubrauð með, en mottóið var að borða fremur létta og holla máltíð að þessu sinni og við systur vorum þó vel saddar eftir laxinn.

Athugasemdir

[johanna L stefansdóttir (IP-tala skráð) 1.4.2010 kl. 15:26]

þetta er flott uppskrift langar að prófa hana næst þegar ég kemst í lax

[Hulda sys (IP-tala skráð) 2.4.2010 kl. 11:34]

Girnileg uppskrift kæra systir, mynd og allt, flott á því.

Knús Hulda