Túnfiskhræra

Ég var beðin um túnfiskhræru hér í athugasemdum og ætla að verða við þeirri beiðni. Mér finnst voða gott að útbúa túnfiskhræru, þ.e. eggjahræru með túnfiski í. Það er reyndar dálítið síðan ég hef gert þannig, en ég ætla að giska á innihaldið.

1 dós túnfiskur
2-3 egg
2-3 msk soya sósa
4-5 sveppir
1/2 paprika
ca. 5 cm blaðlaukur eða 1/4 - 1/2 venjulegur  eða rauðlaukur
3-5 tsk svartur pipar
2-3 tsk tandoori krydd (má sleppa...en mér finnst það bara gera svakalega gott bragð)
3-4 tsk basilikum (eða annað grænt krydd, oregano, timían, rósmarín o.s.frv.)

Aðferð:
Paprika steikt á pönnu við miðlungs hita með smá olíu eða smjöri (ef smjör er notað þarf etv. að lækka aðeins hitann, það brennur auðveldlega), paprikan tekur lengsta tímann svo hún má malla aðeins á pönnunni, ca. 5 mín áður en restin af grænmetinu er sett út á. Eggjunum, túnfisknum, soya og kryddi blandað saman í skál. Má þynna með mjólk eða rjóma ef vill eða bæta við fleiri eggjum. Þegar grænmetið er steikt er gumsinu hellt út á pönnuna. Látið steikjast aðeins að neðan (sem sagt það sem er við pönnubotninn) og svo er bara hært í þessu þar til eggin eru orðin gullin að lit og hætt að vera slepjuleg. Snætt með ristuðu brauði eða hrært saman við núðlur. 

Það má leika sér með innihald í svona eggjahrærur. T.d mætti nota skinku eða kjúkling í stað túnfisksins, jafnvel rækjur eða baunir. Einnig má bara nota það grænmeti sem til er í ísskápnum, maður bara byrjar á harðasta grænmetinu (paprika, sætar kartöflur, kartöflur o.s.frv.) og endar á því sem þarf rétt að snöggsteikja eins og t.d. blaðlauk og graslauk og niðursoðið hráefni eins og maís, einnig ef verið er að nota eldaða afganga. Sveppir, kúrbítur, eggaldin og laukur þarf svipaðan tíma myndi ég áætla. Annars er svo misjafnt hvað fólki finnst gott, t.d. finnst mér allt í lagi þó paprikan sé ekki orðin alveg steikt í gegn, en aftur á móti vil ég að kartöflur og sætar kartöflur séu það. Það borgar sig bara að prófa, sérstaklega ef maður er að losa sig við afganga, þá hefði maður kannski bara hent því í ruslið hvort eð er.

Kjúklingaréttur með kókos og mango chutney

Þessi réttur ætti að duga fyrir 2, en kannski í minnsta lagi ef þeir eru mjög svangir. Það má reyndar drýgja matinn með góðu brauði til hliðar, t.d. naan brauði. Einnig mætti vera meira af grænmeti í réttinum, en þetta var það eina sem ég átti í þetta skiptið. Þetta bragðaðist engu að síður mjög vel.

1 kjúklingabringa
soya sósa
2 1/2 dl soðin hrísgrjón
3 msk mango chutney
3 sveppir
1/4 rauð paprika
1 dl kókosmjólk
1-2 msk rjómaostur
1 tsk svartur pipar
1 tsk tandoori krydd
1 tsk hvítlaukspipar
olía til steikingar og á kjúklinginn
ostur, rifinn eða sneiðar

Bringan skorin í bita og steikt við góðan hita á pönnu upp úr olíu, tandoori kryddi stráð yfir kjúklinginn og góðri slettu af soya sósu. Þegar kjúklingurinn er steiktur í gegn er sveppunum og paprikunni hent út á pönnuna. Kryddað með svörtum pipar og hvítlaukspipar. Mango chutney er hrært saman við, þá kókosmjólkinni og að lokum er rjómaosturinn bræddur saman við. Ath. lækka hitann niður í miðlungs eða lágan hita áður en osturinn er settur út í. Að lokum er soðnum hrísgrjónum bætt út í og svo sett í eldfast mót. Ostur yfir og hitað í ofni við 200°C þar til ostur er gullinn.

Það má nota hvers kyns hrísgrjón í þennan rétt. Ég átti til í ísskápnum hjá mér hrísgrjón með spínati, það er uppskrift frá Rachael Ray, sem má finna hér.

Ég breytti henni lítillega eftir því hvað til var heima hjá mér. Ég hrærði wasabi saman við í stað jalapeno, en það kom ekki nægilega mikið bragð af því. Ég hrærði því saman við vatnið áður en grjónin fóru ofan í, en hefði verið bragðmeira ef ég hefði sett wasabi-ið út í þegar vatnið hafði minnkað aðeins í pottinum. Það var samt fínt að wasabi bragðið hafi verið dauft með kjúklingaréttinum, annars hefði það etv. yfirgnæft mango og tandoori bragðið, hefði kannski ekki passað eins vel saman heldur. Ath. þetta er mjög mikið magn af soðnum grjónum, en gott að eiga tilbúin grjón í ísskápnum og hægt að nota með ýmsum mat. Ég notaði þau t.d. líka með túnfiskgumsi sem ég græjaði á pönnu (túnfiskur, eggjahræra, grænmeti og furuhnetur)

Svona gerði ég grjónin eftir mínu höfði:

1 l vatn
1 grænmetiskraftsteningur
1 tsk wasabi paste hrært saman við vatnið
400 g hrísgrjón
ca. 1/3 stór poki af spínati

Vatn sett í pott með grænmetiskraftinum og wasabi paste. 1 dl af soðinu tekinn frá og geymdur. Hrísgrjónin ristuð á pönnu með smá olíu, þar til það kemur hnetukennd lykt af þeim. Hrísgrjón sett út í vatnið, hiti lækkaður og lok sett yfir. Spínat og 1 dl soð sett í mixara og gert að mauki. Þegar grjónin eru að verða soðin er spínatmaukinu hrært út í pottinn og látið sjóða með.

Verði ykkur að góðu!

Einfaldur lax með spínati, furuhnetum og mango chutney

 

 

Þessi uppskrift er passleg fyrir 2. Við Linda systur snæddum þetta á sl. laugardagskvöld með hvítvíni, það rann afar ljúft niður með þessari dýrindis máltíð.

1 flak ferskur lax, 350-400 g
salt og svartur pipar eftir smekk
1/4 - 1/2 dl soya sósa
1/2 - 1 dl matarolía (mjög gott að nota olíu með sítrónu í)
1/2 lime eða sítróna (eða bara sítrónusafi úr svona flösku, þá u.þ.b. 1/4 dl giska ég á)
4-6 handfylli spínat
1-2 dl furuhnetur
1-2 dl Mild Mango Chutney

Olíu og soya sósu hrært saman og hellt yfir laxinn. Lime/sítrónusafi kreist yfir laxinn og salt og pipar stráð yfir. Flak skorið þversum í 2-3 cm breið stykki. Steikt á pönnu eða grillað þar til fiskurinn er eldaður í gegn. Ég notaði grillpönnu sem er snilldaruppfinning, maturinn verður svo girnilegur með grillrákunum í.

Spínat og furuhnetur sett á disk, steiktu flökin svo sett þar ofan á og að lokum mango chutney. Afskaplega einfalt og lítið uppvask.

Gæti verið gott að hafa snittubrauð með, en mottóið var að borða fremur létta og holla máltíð að þessu sinni og við systur vorum þó vel saddar eftir laxinn.

Hakkréttur

Þessi réttur dugar fyrir 4-6 fullorðna. Við vorum 4 konur sem borðuðum þetta, fengum okkur vel og það var afgangur fyrir mig og Lindu systur daginn eftir og við gátum fengið okkur 2svar á diskinn. Hins vegar ef svangir karlmenn eru annars vegar, er þessi tala frekar 4 en 6.

500-600 g hakk (ég kaupi yfirleitt sparhakk í Bónus, mjög ódýrt og bara í fína lagi með það)
4-5 sveppir
1/2 paprika rauð (eða annar litur, skiptir ekki öllu)
3 konfekttómatar (eða 2 venjulegir)
2 geirar hvítlaukur (eða hálfur heill, ég notaði svoleiðis, fást í litlum körfum í sumum búðum, sætari á bragðið en hinn hefðbundni)
1 lítil dós maísbaunir (eða hálf stærri)
1 og 1/2 bolli hrísgrjón (ég notaði blöndu af venjulegum og villihrísgrjónum, mjög gott)
1-2 msk sweet chilli sósa
1/2 pakki fajitas duft (eða taco)
1-2 msk pestó rautt
1 msk tómatpúrra
2 og 1/2 - 3 bollar vatn fyrir hrísgrjónin
ca. 1 bolli vatn á hakkið (eða eitthvað svoleiðis, kannski minna, kannski meira)
Rifinn eða sneiddur ostur (má sleppa)

Hrísgrjón sett í suðu, etv. með hálfum tening af grænmetiskrafti. Hakk steikt á pönnu. Því næst er hvítlaukur pressaður, saxaður smátt eða raspaður með rifjárni út á. Svo er allt hitt grænmetið, sósurnar og kryddið sett út í. Þegar bæði hrísgrjónin og hakkið er tilbúið er þetta annað hvort sett þannig á borðið, eða eins og ég gerði, hrært saman og sett í eldfast mót með osti yfir, þar til osturinn er gullin að lit. Etv. paprikudufti stráð yfir, það er svo girnilegt þannig. 

Verði ykkur að góðu.

Baunaréttur

Einn fínn gumsréttur fyrir 2-3

1 bolli hrísgrjón (í þetta skiptið notaði ég blöndu af hvítum, hýðis- og villihrísgrjónum)
1/2 teningur grænmetiskraftur

sætar kartöflur, ca. 2 dl eða botnfyllli á wok pönnunni
2 sveppir (eða fleiri, ég átti bara ekki meira)
3 sneiðar kjúklingaskinka
ca. 2-3 dl af kjúklingabaunum
lítil dós kókosmjólk
1/2 smádós tómatpúrra
hvítlaukspipar
tandoori krydd
timían
ca. dl furuhnetur
1-2 msk sweet chilli sósa

Byrjað á að setja hrísgrjónin í pott, það er passlegt að setja 2 og 1/2 eða 3 bolla af vatni á móti einum bolla af grjónum. Krafturinn settur í vatnið og leystur upp, svo grjónin. Soðið eins og pakkning segir til um.  Ath. það þarf meira vatn eftir því sem suðutíminn er lengri.

Sætar kartöflur skornar í frekar litla bita og steiktar á pönnu. Þegar þær eru að verða steiktar í gegn er hinu gumsinu hent saman við, fyrst sveppum og baunum og svo hinu. Kryddað eftir smekk, byrja rólega og smakka til.

Þegar grjónin eru soðin er þeim hrært saman við gumsið og borið fram. E.t.v. er gott að hafa naan brauð eða annað gott með, en ég borðaði þetta bara án meðlætis.

Kjúklingasúpa

Sonur minn fullyrti að hann hefði borðað soðna gulrót og þótt það gott. Ég tók hann á orðinu og sagðist myndu útbúa kjúklingasúpu með gulrótum í. Hann vildi ekki restina af grænmetinu sem fór í súpuna, svo ég sauð allt grænmetið nema gulræturnar í soðvatninu í um 10 mín eða svo, þá síaði ég það og hellti soðinu aftur í pottinn. Þá bætti ég við gulrótunum og restinni af innihaldinu. Þegar súpan var til tók ég nokkrar ausur og setti í sérskál fyrir hann. Þá hellti ég gumsinu sem ég hafði síað frá áður út í pottinn og við systur átum súpuna með öllu gumsinu. Þetta var dálítið bras, ég viðurkenni það, en vel þess virði. Guttinn bragðaði á gulrót (fannst hún reyndar vond þegar upp var staðið) og allir voru sáttir. Hér er uppskriftin:

 1l vatn
 grænmetis eða kjúklingateningur, eða annar kraftur
 1 sellerístöngull
 1-3 hvítlauksgeirar/hálfur heill hvítlaukur (fæst í litlum körfum í matvörubúðum, aðeins sætari en       hinn venjulegi)
 1/2 blaðlaukur (eða annar laukur)
 4-5 sveppir
 grænmetisteningur eða annar kraftur
 4 gulrætur

Grænmetið skorið og þetta er látið malla í einhvern tíma, allavega 10 mín ef ekki meira. 

 4 kjúklingabringur

Kjúklingurinn skorinn niður og steiktur á pönnu. Svo settur út í súpuna.

 2 msk hveiti
 2 msk smjör

Smjör brætt í potti og hveitinu hrært saman við. Hrært svo saman við soðið.

 1/2 l mjólk (má jafnvel setja meira, súpan var frekar þykk)
 1/2l rjómi/matreiðslurjómi
 Tandoori
 svartur pipar
 sletta af sweet chilli sósu (eftir smekk)
 sletta af soya sósu (má sleppa, þetta er alveg nógu salt fyrir)
 lítil dós tómatpúrra
 núðlur t.d. Rice noodles (brotnar niður fremur smátt) nú eða eitthvað pasta bara

Restinni bætt út, magn fer eftir smekk, smakkið ykkur bara áfram.

Upplagt að snæða svona súpur með góðum bollum, nú eða eins og ég gerði; brauðsneiðar með miklu smjöri og jurtasalti hent í grillið í ofninum...sjúklega gott, látið ÞYKKT lag af smjöri og stráið svo Herbamare yfir, leyfið því að grillast vel í ofninum. 

Ég hugsa að það gæti verið gott að sleppa rjómanum og setja í staðinn kókosmjólk. Svo mætti sleppa núðlunum og frekar setja kartöflur eða sætar kartöflur með í súpuna. Einnig væri gott að kaupa svona hakkaða tómata og nota með og hafa þetta meira svona tómatsúpu, sleppa því að baka upp súpuna með hveiti og smjöri. Svona er hægt að leika sér áfram með sama grunninn. Vona að einhverjir njóti góðs af þessari uppskrift, verði ykkur að góðu!

Fiskur og grísk jógúrt í eftirrétt

Fiskur með tómatkókossósu og hrísgrjónum

 

2 flök ýsa (eða annar hvítur fiskur)

 

Marinering:

2-3 dl matarolía

2-3 msk soya sósa (mæli með Kikkoman)

salt og pipar

lime-börkur (smávegis rifið rifjárni, ca. 1 msk)

skvetta af lime-safa (ca. 1/2 dl)

50 g smjör til steikingar

 

Sósa:

1 dós hakkaðir tómatar (ég notaði með papriku og basiliku, úr Nettó)

1 lítil dós kókosmjólk (eða hálf stór dós)

1 askja hvítlauksrjómaostur með graslauk (fæst frá Ostahúsinu og Bónus)

½ paprika

4-5 kartöflur

svartur pipar

2-3 tsk tandoori krydd (fæst t.d. frá Pottagöldrum)

salt

2-3 tsk lárviðarlaufsduft og 2-3 tsk salvíuduft (eða bara eitthvað svona ítalskt grænt krydd)

 

Aðferð:

Ofninn hitaður í 200°C. Kartöflur afhýddar og sneiddar í fremur þunnar sneiðar, ég notaði rifjárn. Þær eru svo skolaðar úr köldu vatni og þeim raðað í eldfast mót. Papriku og blaðlauk stráð ofan á. Tómatarnir, kókosmjólkin og rjómaosturinn hitað á pönnu eða í potti og kryddað. Síðan er því hellt í eldfasta mótið og álpappír settur yfir. Sett í ofninn og hitað í 30-45 mínútur, eða þar til kartöflurnar eru soðnar í gegn.

 

Fiskurinn er skorinn í bita og settur í skál og marineringunni hellt yfir og hrært vel. Látið standa í smá tíma, ca. 5-10 mínútur. Hann er svo steiktur upp úr smjöri við fremur lágan hita þar til hann er eldaður í gegn.

 

Þetta er svo borið fram með hrísgrjónum, ég valdi blöndu af villihrísgrjónum og hýðishrísgrjónum (villihrísgrjónin eru svört) Í vatnið bætti ég við grænmetiskrafti í stað salts. Munið að athuga suðutíma á grjónunum áður en hafist er handa, því hann getur verið frá 10 mínútum upp í 45 mínútur.

 

Eftirréttur úr grískri jógúrt

 

1 dós grísk jógúrt

1-2 dl bláber

vínber

2-3 msk hunang

1 msk heslihnetusýróp (má sleppa, en gefur mjög skemmtilegt bragð)

Botn:

3-4 dl múslí (ég notaði Chrunchy frá Euroshopper, einnig má nota kex)

súkkulaðispænir (þarf ekki ef notað er súkkulaðikex)

1 dl pönnukökusýróp

smávegis vatn

 

Aðferð:

Múslí, súkkulaðispænir, pönnukökkusýróp og smá slettu af vatni (svo að botninn verði aðeins blautari og fastari í sér) hrært saman og sett í botn á eldföstu móti. Bláber stöppuð/kramin eða sett í matvinnsluvél og jógúrtinni blandað saman við. Heslihnetusýróp og hunangi svo hrært saman við. Þessari blöndu er svo hellt ofan á botninn. Vínber skorin í bita og sett ofan á. Þetta er svo kælt og jafnvel fryst í smátíma áður en það er borið fram.

 

Njótið vel!

Pizzustangir, tómatar í ofni og grænmetisgums

Hér koma 3 uppskriftir sem voru að líta dagsins ljós. Gjörið þið svo vel!

 

Pizzustangir

 

2 bollar hveiti

2 bollar heilhveiti

1 pk. ger (ca. 11g eða 3 tsk)

2 bollar ylvolgt vatn

4 msk olía

2 tsk salt

ca. 3 msk. ítalskt krydd (grænar kryddjurtir)

ca. 1 msk. hvítlaukspipar

1-2 msk. pizzusósa (má sleppa eða vera meira)

rifinn ostur (ca. 100g eða eftir smekk)

4 sneiðar skinka

 

Allt blandað saman nema ostur og skinka, fyrst þurrefni svo blauta. Látið lyfta sér í a.m.k. 20-30 mínútur, eða þar til deigið hefur lyft sér um helming (almennur hefunartími gerdeigs er reyndar um 45-60 mínútur og betra að láta lyfta sér lengur en skemur). Ég hef ofninn stilltan á 100°C og hef smá rifu og læt skálina vera þar fyrir ofan. Margir setja sjóðandi heitt vatn í vaskinn og láta skálina standa í vatnsbaðinu, það er mjög fljótleg aðferð við að hefa. Aðalatriðið er bara að láta skálina standa á hlýjum stað.

 

Þegar deigið hefur lyft sér er það hnoðað aftur, kannski þarf aðeins meira hveiti. Eldfast mót er smurt og helmingurinn af deiginu er flattur út í mótið. þá er ostinum og skinkunni dreift yfir og svo hinn helmingurinn af deiginu flattur yfir. Þá er skorið í efri hluta deigsins, þversum eins og gert er við hálfmána á veitingastöðum. Þetta er bakað í ca. 30 mínútur, eða þar til skorpan er orðin gullinbrún og brauðið er bakað í gegn.

 

Ofnbakaðir tómatar í rjómaosti

 

Rjómaostur smurður í botn á eldföstu móti, tómatsneiðar lagðar ofan á og að lokum ólívur, t.d. grænar með paprikufyllingu. Salt og pipar yfir. Sett í ofn stilltan á grill (225-250°C) og bakað í um 10-15 mínútur eða þar til ólívur og tómatar hafa fengið smá grilláferð.

 

Þessu má hella yfir pasta, hrísgrjón, eða hvað sem manni dettur í hug. Gæti t.d. verið gott með ítölskum kjötbollum eða ofan á gott brauð.

 

Grænmeti með mango chutney

 

sætar kartöflur

tómatar

blaðlaukur

paprika

maís

 

olía

1 msk mango chutney

soya sósa

ítalskt krydd

pipar

salt

 

Blautmetinu og kryddinu hrært vel saman. Allt eftir smekk, þ.e. magnið. Þessu er svo hellt yfir niðurskorið grænmetið í eldföstu móti og eldað við 200°C í ca. 30 mínútur, eða þar til sætu kartöflurnar eru orðnar soðnar í gegn. Það er líka mjög gott að nota pestó í stað mango chutney.

 

Þetta borðuðum við Linda systir með ítölskum kjötbollum og núðlum (átti ekki spaghettí) og þetta bragðaðist ansi vel.

 

 

Fiskur í ofni með ostasósu

Þessi uppskrift dugar handa 3-4 fullorðnum og bragðaðist mjög vel. Gjörið þið svo vel!

 

Fiskur í ofni með ostasósu 

2 flök fiskur (eða 4 minni bitar)

blaðlaukur

epli

paprika

tómatar

furuhnetur

kókosflögur

2 bollar hrísgrjón eða 1 poki (ég notaði blöndu af villihrísgrjónum, rauðum hrísgrjónum og hýðishrísgrjónum frá Rapunzel að mig minnir)

Krydd sem notuð voru á fiskinn: Fiskikrydd frá Gevalia og hvítlaukspipar 

Sósa:

1 askja rjómaostur með sólþurrkuðum tómötum

1/2 askja hreinn rjómaostur (stærri askjan)

mjólk 1/4-1/2 líter, ekki meira en 1/2, má líka nota rjóma

Krydd í sósu: Fiskikrydd, hvítlaukspipar og karrý 

Aðferð: Hrísgrjón soðin. Fiskur skorinn í bita og kryddaður. Yfir hann er sett restin af innihaldinu. Því næst hrísgrjónin þegar þau eru soðin og að lokum hellist sósan yfir allt saman og ostur settur yfir og inn í ofn í ca. 30 mínútur. 

 Ath: Sum hrísgrjón hafa mjög langan suðutíma, því er best að athuga það áður en hafist er handa við hitt. 

Tómatmakkarónur

Gleðileg jól og gleðilegt nýtt ár!!

Þennan rétt gerði ég fyrir jólasaumaklúbbinn við nokkuð góðar undirtektir.

 

Hráefni:

Makkarónur, ca. 300 400g miðað við ósoðnar

1/2 -1 pakki skinka (svona bunkapakki)

1/2 - 1 dós niðursoðnir tómatar (stewed tomatoes frá Hunt's)

1 lítil dós gulrætur (svona niðursoðnar baby-gulrætur, en endilega notið frekar ferskar ef þið hafið tíma)

ca. 2-3 dl soðnar kjúklingabaunir

1 lítill eða hálfur stór rauðlaukur

1/4 líter grænmetissoð (teningar frá Knorr)

ca. 2 dl rjómi

ca. 2 dl mjólk

ca. 2-3 dl tómatsósa

svartur pipar

Chicken Herb Seasoning with garlic and herbs (hvítlauk og jurtum) frá McCormick  

 

Aðferð: Makkarónur soðnar. Allt hitt steikt á pönnu, byrjað á lauknum, skinkunni og tómötunum síðan baunirnar og gulræturnar. Soðnum makkarónum blandað saman við sósuna og sett í eldfast mót. Rifinn ostur yfir og hitað í ofni við 200°C í ca. 15-20 mínútur, eða þar til osturinn er orðinn gullinbrúnn. Einnig má borða þetta beint af pönnunni með einhverju meðlæti, brauði, salati eða hverju sem hugurinn girnist. Einnig er eflaust mjög gott að nota hrísgrjón í stað makkaróna. Verði ykkur að góðu!